de lectione recentissima sancti euangelii, donante domino, alloquor uos, et in illo exhortor, ut contra tempestates et fluctus saeculi huius non dormiat fides in cordibus uestris. non enim reuera dominus Christus mortem habuit in potestate, somnum non habuit in potestate; et forte omnipotentem nauigantem somnus pressit inuitum. hoc si credideritis, dormit in uobis: si autem in uobis uigilat Christus, uigilat fides uestra. apostolus dicit, {habitare Christum per fidem in cordibus uestris.} ergo et somnus Christi signum est sacramenti. nauigantes sunt animae in ligno saeculum transeuntes. etiam nauis illa ecclesiam figurabat. et singuli quippe templa sunt dei, et unusquisque in corde suo nauigat: nec facit naufragium, si bona cogitat.
audisti conuicium, uentus est: iratus es, fluctus est. uento igitur flante, fluctu surgente, periclitatur nauis, periclitatur cor tuum, fluctuat cor tuum. audito conuicio uindicari desideras: et ecce uindicatus es, et malo alieno cedens, fecisti naufragium. et quare hoc? quia dormit in te Christus. quid est, dormit in te Christus? oblitus es Christum. excita ergo Christum, recordare Christum, euigilet in te Christus: considera illum. quid uolebas? uindicari. excidit tibi, quia ipse cum crucifigeretur dixit: {pater, ignosce illis, quia nesciunt quid faciunt?} qui dormiebat in corde tuo, noluit uindicari. excita illum, recole illum. memoria ipsius, uerbum ipsius: memoria ipsius, iussio ipsius. et dices apud te, si uigilat in te Christus: qualis ego homo, qui uolo uindicari? qui sum ego, qui in hominem exsero comminationes? morior forte antequam uindicer. et cum anhelans, ira inflammatus, et sitiens uindictam, exiero de corpore, non me suscipit ille qui noluit uindicari: non me suscipit ille qui dixit, {date, et dabitur uobis; dimittite, et dimittetur uobis.} ergo compescam me ab iracundia mea, et redibo ad quietem cordis mei. imperauit Christus mari, facta est tranquillitas.
quod autem dixi ad iracundiam, hoc tenete regulariter in omnibus tentationibus uestris. nata est tentatio, uentus est: turbatus es, fluctus est. excita Christum, loquatur tecum. {quis est hic, quando et uenti et mare obediunt ei?} quis est hic, cui obaudit mare? ipsius est mare, et ipse fecit illud. omnia per ipsum facta sunt. magis imitare uentos et mare: obtempera creatori. sub iussione Christi mare audit, et tu surdus es? mare audit, et uentus cessat, et tu sufflas? quid? dico, facio, fingo: quid est aliud nisi sufflare, et sub uerbo Christi nolle cessare? non uos uincat fluctus in perturbatione cordis uestri. sed tamen quia homines sumus, si uentus impulerit, si affectum animae nostrae mouerit, non desperemus: Christum excitemus, ut in tranquillo nauigemus, et ad patriam ueniamus. conuersi ad dominum.
